Guðjón Guðmundsson (um atkvæðagreiðslu):
Herra forseti. Það er kominn hefðbundinn vorfiðringur í stjórnarandstöðuna. Hér eru 57 mál á dagskrá og menn virðast ætla að ræða til hádegis um störf þingsins, um fundarstjórn forseta, úrskurð forseta, um þingsköp o.fl. --- allt til að koma í veg fyrir að eitt tiltekið mál komist á dagskrá. Við þekkjum þetta sem höfum setið hér lengi ... (Gripið fram í: Þetta er ómálefnalegt.) Gott væri ef hv. þingmenn Vinstri grænna gætu setið á sér. Þeir geta kannski fengið orðið þegar ég er búinn ef þeim sýnist svo. Þeir hafa talað talsvert um þetta mál.
Þetta er bara árvisst hérna. Alltaf þegar líður að þinglokum á vorin byrjar þetta ströggl. Það er farið að ræða fundarstjórn forseta, störf þingsins og þetta og hitt og einhver tafafiðringur í mönnum. Ég skil þetta ekki alveg.
Ég bið hv. þingmenn stjórnarandstöðunnar að snúa sér að því að ræða þau fjölmörgu mál sem hér eru á dagskrá, hætta þessu ströggli og virða úrskurð forseta og stjórn hans á þinginu. Hann kann þetta öðrum mönnum betur. Við getum alveg treyst úrskurðum hans. (SJS: Við viljum að farið sé að lögum.)