Jón Bjarnason:
Herra forseti. Þessi till. til þál. um flugmálaáætlun er aðeins fyrir árið 2002. Eins og hefur komið fram hefði verið eðlilegast að við fjölluðum um fjögurra ára áætlun í flugmálum, þ.e. framkvæmda- og viðhaldsáætlun. Ég ítreka það sem ég sagði við umræðuna hér á undan um till. til þál. um vegáætlun sem líka var til eins sumars, að ég tel að það hefði átt að leggja fram fjögurra ára áætlun þannig að það sæist hvaða samfella væri fyrirhuguð á þessum verkefnavettvangi, þó svo síðan það hefði verið samhæft og samræmt í haust eða á næsta ári í tengslum við breytta tilhögun þar sem gert er ráð fyrir að unnin verði samræmd samgönguáætlun fyrir flug, vegi og flutninga á sjó.
Ég vil halda þessu til haga, virðulegi forseti, og ítreka að ég tel að svo hefði átt að vera, því að bæði varðandi framkvæmdir og framtíðarsýn hefði verið rétt að það hefði verið tilgreint hver væri stefnan til næstu ára í megindráttum, því að sjálfsögðu verða enga framkvæmdir unnar fyrr en fyrir liggur fjármagn, þ.e. afgreiðsla fjárlaga til þeirra verkefna.
Þá vil ég, herra forseti, spyrja hæstv. samgrh. hvort samþykkt á nýjum lögum um loftferðir hefðu haft breytingar í för með sér nú þegar á flokkun flugvalla í landinu. Hvort flugvellir yrðu flokkaðir í t.d. flokk 1--6 eftir því hvers konar umferð gert er ráð fyrir að fari um þá velli og hvers konar kröfur þeir eigi að uppfylla. Ég vildi forvitnast um hvort nýsamþykkt lög um loftferðir hefðu haft áhrif á að breyta flokkun á einstökum flugvöllum í landinu. Og í öðru lagi hvort þessi nýsamþykktu lög um loftferðir hafi haft í för með sér aukinn kostnað sem þurfi að ráðast í varðandi aðbúnað á flugvöllum í landinu og að hve miklu leyti, ef svo er, hvort þess sér stað í frv. sem hér er til umræðu. Því í frv. um loftferðir var einmitt kveðið nánar á um auknar kröfur og um ýmiss konar aðbúnað sem gera þyrfti til flugvalla til þess að þeir uppfylltu þær kröfur sem var verið að skerpa á og setja í lögum um loftferðir. Hvaða áhrif hefur það nú þegar haft á flugmálaáætlum sem við erum að fjalla um hér eða hvaða áhrif mun það hafa á flugmálaáætlun?
Síðan vildi ég forvitnast nánar um Ísafjarðarflugvöll. Umræða hefur verið á undanförnum árum um að koma þar upp búnaði sem nýttist til þess að þangað mætti fljúga eftir að komið væri á myrkur. Það mundi gjörbreyta samgöngum við Ísafjörð ef flugvöllurinn væri búinn slíkum tækjum að hægt verði að koma þar að í myrkri. Þetta hefur verið til umræðu sitt á hvað. Stundum hafa komið upp ábendingar um að þetta væri hægt og síðan aðrar um að þetta væri ekki hægt. Ég vil fá að heyra hvernig þetta mál stendur nú og þá röksemdafærslu sem liggur þar fyrir.
Virðulegi forseti. Umræða hefur verið um og virkilegur áhugi á því að bæði Egilsstaðaflugvöllur og Akureyrarflugvöllur gætu í auknum mæli þjónað sem alþjóðlegir flugvellir. Þangað væri hægt að skipuleggja flug erlendis frá og jafnvel að flugvellir eins og Egilsstaðaflugvöllur gætu verið áningarstaður fyrir flug, fyrir fragtflug frá Evrópu, frá Rússlandi til Bandaríkjanna, t.d. til eldsneytistöku eða annarra slíkra þátta sem væri nauðsynlegt að fá aðstöðu fyrir og þarna gæti orðið viðskipta- og atvinnugrundvöllur t.d. fyrir flugvöllinn á Egilsstöðum. Mig langar til að forvitnast um hvernig Egilsstaðaflugvöllur og Akureyrarflugvöllur eru í stakk búnir til þess að takast á við slíkt verkefni, aukna umferð og aukna millilandaumferð sem ég tel mjög mikilvægt að verði.
Hæstv. samgrh. kom í umræðunni inn á vopnaleit og þess háttar nokkuð sem gæti náttúrlega verið veruleg fjárhagsleg íþynging ef slíkt þyrfti að taka upp hér í innanlandsfluginu. En það sem ég spyr fyrst og fremst um varðandi þá flugvelli væri annar tæknilegur búnaður, flugvöllurinn sjálfur og sá aðbúnaður sem þar þarf að vera. Ég vil líka fá að heyra --- umræða var hér í fyrra og hittiðfyrra um eldsneyti, um eldsneytisafgreiðslur á þeim flugvöllum --- á hvaða stigi það er. Hvort verð á eldsneyti á Akureyrarflugvelli og Egilsstaðaflugvelli sé svipað og verð á eldsneyti á Reykjavíkurflugvelli eða Keflavíkurflugvelli. Hvort einhver mismunun sé í samkeppnisstöðu þessara flugvalla hvað varðar verð á flugvélaeldsneyti og auk þess líka á möguleikunum á að dæla eldsneyti á viðkomandi flugvélar. Fyrir tveimur árum man ég að sú staða var á Egilsstöðum að þar annaði ekki einu sinni dælan því að dæla eldsneyti á flugvélar með viðeigandi hætti. Hvernig er sú staða nú? Það má vel vera að hæstv. ráðherra hafi þetta ekki á hraðbergi, en þá mundi ég óska að þessar upplýsingar kæmu fram í samgn. í umfjöllun um málið. Hver er staða þeirra flugvalla til að taka á sig aukna alþjóðlega umferð, bæði tæknileg staða og samkeppnisleg staða hvað þetta varðar?
Eitt annað langaði mig líka til að minnast á, virðulegi forseti, það er varðandi ábyrgð á flugvallarsvæðum og nágrenni þeirra. Það var óljóst í umfjöllun um lögin um loftferðir hvar sú ábyrgð lægi varðandi mannvirki eins og umgjörð í kringum flugvelli, girðingar og annað slíkt, hvar lægi ábyrgð á vegum sem lægju að flugvöllum sem ekki væru lengur í notkun sem áætlunarflugvellir, hver bæri ábyrgð á slíkum vegum?
Að óbreyttu eru slíkir vegir orðnir einskismannsvegir, því vegir sem liggja að flugvöllum sem ekki eru áætlunarflugvellir --- það er náttúrlega alveg ótækt. Auðvitað þurfa vegir að flugvöllunum að vera skilgreindir að mínu mati sem hluti af flugvallarsvæðinu og á ábyrgð þeirra.
Virðulegi forseti. Málið kemur að sjálfsögðu til umræðu í samgn. og þá getum við farið nánar í einstaka þætti þess, en ég hef nefnt nokkur atriði sem mér fannst vera ástæða til að fá upplýst.