[prenta uppsett í dálka] 115. fundur, 127. lþ.
Guðjón A. Kristjánsson (andsvar):
Herra forseti. Ég er alveg sammála ráðherranum um að hann og margir forverar hans hafi gert mörg mistök við úthlutun á heimildum. Þegar verið er að úthluta nýjum tegundum og þegar skipaflotar fá ný og varanleg verkefni eins og í þessu tilviki tel ég að skoða eigi hver innskilareglan eigi að vera úr því að við erum með það í lögum.
Ég hygg að ég fari rétt með að bæði hafi verið skilað inn á Reykjaneshrygg á sínum tíma og á Flæmingjagrunni. Hins vegar kom útfærslan á innskilareglunni eins og á Reykjaneshrygg náttúrlega mjög misjafnlega út vegna þess að mönnum var gefið sjálfdæmi í því að skila í ákveðnum tegundum. Ef ég man rétt, þegar þessi úthlutun átti sér stað á Reykjaneshryggnum, skiluðu flestir inn í ufsa sem þá veiddist ekki. Þar fyrir utan átti togaraflotinn stærstu heimildirnar í ufsanum og fékk þeim þar af leiðandi endurúthlutað í staðinn fyrir að skilað væri jafnt inn í þorskígildum.
Þetta vildi ég láta koma fram við þessa umræðu. Ég tel nauðsynlegt að farið verði gaumgæfilega yfir þetta mál í sjútvn., forsöguna, lögin eins og þau eru í dag og hvaða áhrif þetta hefur til framtíðar.
Ég hygg að þótt kvótakerfið sé um margt umdeilanlegt sé einna mestur friður um kvótastýringuna á veiðum uppsjávarfisksins, þar megi frekast nýtast við að þar hafi tekist sæmilega til.
