[prenta uppsett í dálka] 115. fundur, 127. lþ.
Utanríkisráðherra (Halldór Ásgrímsson) (andsvar):
Herra forseti. Það liggur ljóst fyrir að ríkisstjórnin vann að því að fá íslenska sérákvæðið til að skapa svigrúm fyrir uppbyggingu þessara atvinnufyrirtækja. Þess vegna hafa þau verið að rísa. Þess vegna var Ísal stækkað. Þess vegna var álverksmiðjan í Hvalfirði byggð og járnblendiverksmiðjan stækkuð.
Ég hef litið þannig á málflutning hv. þingmanna, sem ég hef vitnað til, að við hefðum ekki átt að biðja um þetta eða vinna að málinu. Nú heyri ég að hv. þm. dregur í land og það er vel.
Ég veit ekki betur en að flokkur hans tali um það í sveitarstjórnarmálum uppi á Akranesi að það beri að stækka Norðurál í Hvalfirði. Á sama tíma hefur mér heyrst að hér á Alþingi séu hv. þm. sama flokks að berjast gegn því að þessi verksmiðja geti starfað, m.a. með afstöðu í þessu máli.
Það má vel vera að hv. þm. líki það illa að þessi þáttur sé dreginn fram og hann þoli það illa. Hann telur kannski ekkert mál að vera á móti svona málum og geta síðan sagt að það skipti engu máli, það hafi engin áhrif. Ég heyri að að hv. þm. tekur það tekur það til sín. En það er nauðsynlegt að draga fram þennan sannleika. Menn geta ekki komist upp með endalausan tvískinnung í atvinnumálum.
