Árni Steinar Jóhannsson (andsvar):
Virðulegi forseti. Mér fannst hæstv. iðnrh. ekki svara neinu því sem ég spurði um, þ.e um málatilbúnað hennar í þessu máli. Þetta er vel rekið fyrirtæki. Það kemur fram í greinargerðinni. Það á að selja þetta fyrirtæki á sama tíma og hæstv. ráðherra upplýsir að stöðug vinna sé í gangi til að finna atvinnutækifæri sem henta á landsbyggðinni. Þetta kemur ekki alveg heim og saman. Hvers vegna í ósköpunum er þetta mál komið fram á þennan hátt?
Síðan vil ég fá svar við öðru. Nú er Kaupfélag Skagfirðinga sett í varnarstöðu. Telur hæstv. ráðherra ekki að það sé mjög hæpin byggðaaðgerð? Dæmið væri öðruvísi ef um væri að ræða vonlausa verksmiðju. En hér er upplýst að þetta er fyrirmyndarfyrirtæki sem á bjarta framtíð fyrir sér á þeim grunni sem það er á núna. Ég segi fyrir mína parta að verksmiðjan sé hin besta byggðaaðgerð, enda var staðsetning hennar á sínum tíma byggðaaðgerð. Verksmiðjan var reist sem slík og er nú komin á góðan rekstrargrunn. Hefði ekki verið nær að taka stöðuna þrátt fyrir fjárhagsörðugleika sveitarfélagsins og renna inn styrkum stoðum þarna þó svo sveitarfélagið væri leyst undan þátttöku sinni í fyrirtækinu?