[prenta uppsett í dálka] 123. fundur, 127. lþ.
Ögmundur Jónasson (andsvar):
Herra forseti. Ég ætlaði að sækjast eftir nánari skýringum. Hér hefur verið haft á orði að verið sé að snúa við hlutafélagavæðingu og færa undir ríkið starfsemi sem áður var á vegum hlutafélags. Staðreyndin er sú að eftir stendur að sjálf skurnin verður á vegum hins opinbera en það er í valdi dómsmrh. hvert af þeim verkefnum sem tilgreind eru í 7. gr. frv. yrði falið öðrum aðilum.
Hv. formaður allshn. lýsti skoðun sinni á hvað ætti að heyra til hinu opinbera og hvað ætti að fara til aðila á markaði. Í lagatextanum segir að það verði í valdi dómsmrh. hverju sinni hvernig þessum verkefnum verður ráðstafað. Finnst hv. formanni allshn. ekki nauðsynlegt að skilgreina nánar í lögunum hvernig þessum málum skuli háttað í stað þess að það sé háð geðþóttavaldi dómsmrh. hverju sinni hvert hann setur verkefnin?
