[prenta uppsett í dálka] 124. fundur, 127. lþ.
Margrét Frímannsdóttir (andsvar):
Virðulegi forseti. Í nefndaráliti frá iðnn. segir m.a., með leyfi forseta:
,,Í frumvarpinu er lagt til að sú framkvæmd sem tíðkast hefur á niðurgreiðslum verði lögfest með skýrum hætti. Þó eru lagðar til nokkrar breytingar á framkvæmdinni sem eru þær helstar að mögulegt verður að greiða niður hitun með olíu hjá þeim sem ekki eiga kost á annarri hitun, eigendur smávirkjana eiga kost á niðurgreiðslu á rafhitun, notkun varmadælna til að hita íbúðir verður gjaldgeng til niðurgreiðslu húshitunarkostnaðar, hitaveitur sem ekki eru opinberar veitur geta fengið styrk til stofnunar nýrrar veitu eða stækkunar eldri veitu, ...``
Ég vil spyrja hv. frsm. nefndarinnar um þessar smávirkjanir. Hvað felst nákvæmlega í þessu? Mér hefur ekki unnist tími til þess að fara yfir þetta nál. ítarlega. En hvað felst í þessu? Eiga þeir sem eru með smávirkjanir sama kost og hitaveitur sem ekki eru opinberar veitur, þ.e. að fá styrk t.d. til þess að stækka veitur sínar?
