Margrét Frímannsdóttir (andsvar):
Virðulegi forseti. Hvað með þá bændur sem þegar hafa virkjað og reka smávirkjanir og hafa fullnægt orkuþörf sinni um einhvern tíma? Í síðari liðnum er um að ræða sérstakan styrk. Þarna eru niðurgreiðslurnar en hins vegar er styrkurinn til að stækka veitur.
Í nál. segir að hitaveitur sem ekki eru opinberar veitur geti fengið styrk en í frv. er talað um niðurgreiðslur á rafhitun. Gildir hið sama varðandi þessar smávirkjanir, að möguleiki sé á styrk til þess að stækka þær? Ég hefði viljað fá svör við því hvort möguleiki er fyrir þá sem reka þessar smávirkjanir á sambærilegum styrk og þeir fá sem ætla að stækka hitaveitur sem ekki eru opinberar.