[prenta uppsett í dálka] 132. fundur, 127. lþ.
Steingrímur J. Sigfússon:
Herra forseti. Ég tek undir það með hv. þm. Kristni H. Gunnarssyni að framganga forsrh. í þessu máli hefur verið furðuleg en því lýsti hv. þm. svo í viðtali við fjölmiðla í mars 2001. Ekki tekur betra við þegar málinu er þjösnað í gegnum þingið með þeim hætti sem raun ber vitni eftir að stjórnarflokkarnir hafa loksins lamið sig saman um málið í bakherbergjum. Hér áðan gerðist sá dapurlegi atburður að ofan í kaupið felldi meiri hlutinn einfaldar brtt. sem hefðu þó lagfært málið, annars vegar gagnvart starfsmönnum og hins vegar tryggt að Alþingi hefði eitthvert bolmagn til að skoða þjóðhagsleg málefni á sjálfstæðum forsendum eftir að Þjóðhagsstofnun væri slegin af. En það er til marks um vinnubrögðin og viðhorfin hjá stjórnarliðinu að ekki einu sinni er léð máls á lagfæringum af þessu tagi, t.d. hvað það varðar að tryggja starfsmönnum sambærleg störf. Það er of mikið í lagt af hálfu stjórnarinnar. Það er því ekki annað hægt, herra forseti, en að lýsa skömm sinni á þessum vinnubrögðum.
