[prenta uppsett í dálka] 132. fundur, 127. lþ.
Steingrímur J. Sigfússon:
Herra forseti. Síðasti málsliður 1. gr. hljóðar svo:
,,Fjármálaráðherra veitir ábyrgðina að uppfylltum þeim skilyrðum sem hann metur gild.`` --- Punktur.
Þetta eru hin tilteknu skilyrði sem hæstv. fjmrh. vísar til og reynir að verja sig með. Hér er verið að setja á borð eins manns, hæstv. fjmrh., einhver þann hroðalegasta kaleik sem ég veit til að nokkrum manni hafi verið skenktur í pólitík. En þó að hlutur hæstv. fjmrh. sé ótrúlegur í þessu máli, þ.e. að standa hér að verki með þessum hætti og ómerkja nýlega sett lög um ríkisábyrgð, þá er þetta mál auðvitað á ábyrgð ríkisstjórnarinnar allrar, allra ráðherranna og allra þeirra þingmanna sem ætla að greiða því atkvæði sitt, þar með talið Framsfl. Þó að hann hafi falið sig í þessari umræðu þá birtist hann hérna í atkvæðagreiðslunni.
