Frsm. meiri hluta sjútvn. (Einar K. Guðfinnsson) (andsvar):
Virðulegi forseti. Hv. 4. þm. Vestf. spurði mig tveggja spurninga. Hann spurði annars vegar hvort ég hefði ekki áhyggjur af ákvæði í þessu frv. um stækkun krókaleyfisbáta úr 6 tonnum í 15 tonn. Ég hef ekki áhyggjur af því. Ég held að þetta sé að flestu leyti skynsamlegt skref eins og ég hef áður fært rök fyrir. Þetta mun auka öryggi við sjósókn, auka öryggi við hráefnisöflun. Ég held að í sjálfu sér sé þetta mjög skynsamleg leið.
Hv. þm. velti fyrir sér hvort þetta mundi ekki draga úr sérstöðu kerfisins. Ég held að svo sé ekki. Í þessu sambandi bendi ég m.a. á að menn hafa verið að tala um það á undanförnum árum að nauðsynlegt sé að þróa þetta kerfi þannig að það nái til þess sem menn hafa kallað strandveiðiflotann. Þar hafa menn verið að tala um stærri báta en 6 tonn. Ég held að það sé ekkert vandamál að tryggja sérstöðu þessara báta.
Ég er hins vegar þeirrar skoðunar að það eigi ekki að gefa nokkuð eftir með að þetta verði krókaleyfisfloti. Í mínum huga eru fyrst og fremst líffræðileg rök fyrir því. Með því sækjum við í réttar stærðir fisks, þá stærð sem við viljum sækja og þannig eru þessi fiskifræðilegu, líffræðilegu rök.
Í öðru lagi spurði hv. þm. mig varðandi úthlutun á byggðakvóta. Það er rétt að upp koma ýmis umdeilanleg tilvik og ég tel sjálfsagt að menn fari ofan í þau efnislega áður en næsta úthlutun á sér stað. Sérstaklega ber að skoða hvernig hægt er að koma í veg fyrir að bátar sem starfa í raun ekki í viðkomandi byggðarlögum fái þessa byggðakvóta. Mér finnst alveg sjálfgefið að skoða sérstaklega stöðu einstakra byggðarlaga eins og þeirra sem hv. þm. nefndi. Ég vek í því sambandi líka athygli á að við kusum að opna, í brtt. meiri hluta sjútvn., á viðbótarbyggðapott, þ.e. láta þann byggðapott sem gert er ráð fyrir að taki gildi um næstu fiskveiðiáramót taka gildi að 1/3 þegar á þessu ári. Þarna skapast auðvitað ákveðið svigrúm til að koma til móts við þarfir viðkomandi byggðarlaga.