Guðjón Guðmundsson (andsvar):
Herra forseti. Ég held að ég geri mér ágætlega grein fyrir stöðu ríkisfjármálanna og stöðu ríkissjóðs og ég veit að hv. þm. gerir það líka þó að hann tali í þessum tón. Staðreyndin er sú að við höfum rekið ríkissjóð ár eftir ár með miklum afgangi. Við höfum verið að greiða niður skuldir ríkisins í stórum stíl sem þýðir á móti að vaxtagreiðslur ríkisins lækka um milljarða. Kaupmáttur fólksins í landinu hefur aukist meira hér en í nokkru öðru landi eins og ég gat um í ræðu minni.
Varðandi það að skattbreytingarnar komi eitthvað sérstaklega illa niður á landsbyggðinni, þá þoli ég það bara satt að segja ekki þegar menn tala alltaf um atvinnulíf á landsbyggðinni eins og það sé annars flokks atvinnulíf. Af hverju talar hv. þm. um fyrirtækin á landsbyggðinni eins og þau séu einhver annars flokks fyrirtæki? Ég skil það ekki.