Forseti (Halldór Blöndal):
Borist hefur svohljóðandi bréf, dags. 8. okt. 2001.
,,Þar sem Lúðvík Bergvinsson, 6. þm. Suðurl., er erlendis í opinberum erindum og getur því ekki sótt þingfundi næstu tvær vikur óska ég eftir því með vísan til 2. mgr. 53. gr. þingskapa og bréfs 1. varaþm. á lista Samfylkingarinnar í Suðurlandskjördæmi, Katrínar Andrésdóttur héraðsdýralæknis, að 2. varaþm. á listanum, Björgvin G. Sigurðsson framkvæmdastjóri, taki sæti hans á Alþingi á meðan.
Virðingarfyllst,
Bryndís Hlöðversdóttir,
formaður þingflokks Samfylkingarinnar.``
Hér er bréf frá Katrínu Andrésdóttur, dags. 8. okt. 2001
,,Undirrituð tilkynnir hér með að vegna anna nú þegar hæst hóar í sláturtíð sé ég mér ekki fært að taka sæti á Alþingi nú á haustdögum 2001.
Virðingarfyllst,
Katrín Andrésdóttir.``
Björgvin G. Sigurðsson hefur áður tekið sæti á Alþingi og er boðinn velkominn til starfa á ný.
Þá hafa enn fremur borist þessi bréf:
,,4. okt. 2001.
Þar sem ég get ekki af persónulegum ástæðum sótt þingfundi næstu tvær vikur óska ég eftir því með vísan til 2. mgr. 53. gr. þingskapa að 1. varaþm. á lista Samfylkingarinnar í Norðurl. e., Örlygur Hnefill Jónsson lögmaður, taki sæti mitt á Alþingi á meðan.
Virðingarfyllst,
Svanfríður Jónasdóttir, 4. þm. Norðurl. e.``
,,Reykjavík, 8. okt. 2001.
Þar sem ég er á förum til útlanda í opinberum erindum og get því ekki sótt þingfundi á næstunni óska ég eftir því með vísan til 2. mgr. 53. gr. þingskapa og bréfs 1. varaþm. á lista Framsfl. í Suðurlandskjördæmi, Ólafíu Ingólfsdóttur, að 2. varaþm. á listanum, Ármann Höskuldsson forstöðumaður, taki sæti mitt á Alþingi á meðan.
Virðingarfyllst,
Guðni Ágústsson, 2. þm. Suðurl.``
,,Selfossi, 7. okt. 2001.
Herra forseti Alþingis,
Halldór Blöndal.
Sökum anna get ég ekki tekið sæti Guðna Ágústssonar ráðherra, 2. þm. Suðurl., á Alþingi.
Þetta tilkynnist hér með.
Virðingarfyllst,
Ólafía Ingólfsdóttir,
1. varaþm. Framsfl. í Suðurl.``
Enn hefur mér borist bréf, dags. 8. okt. 2001.
,,Þar sem ég er á förum til útlanda í opinberum erindum og get því ekki sótt þingfundi næstu tvær vikur óska ég eftir því með vísan til 2. mgr. 53. gr. þingskapa að varaþingmaður Framsfl. í Vestfjarðakjördæmi, Ólöf Guðný Valdimarsdóttir arkitekt, taki sæti mitt á Alþingi á meðan.
Virðingarfyllst,
Kristinn H. Gunnarsson, 3. þm. Vestf.``
Kjörbréf Ólafar Guðnýjar Valdimarsdóttur, Örlygs Hnefils Jónssonar og Ármanns Höskuldssonar hafa þegar verið rannsökuð og samþykkt. En þar sem þau hafa eigi tekið sæti á Alþingi fyrr ber þeim að undirrita drengskaparheit.