Sjávarútvegsráðherra (Árni M. Mathiesen) (andsvar):
Herra forseti. Ef mig misminnir ekki þá var þetta lítilræði sem átti að innkalla 4--5% á ári. Það er í nokkru samræmi við það sem kom fram í tillögum Kristins H. Gunnarssonar og Árna Steinars Jóhannssonar sem hv. fulltrúar Samfylkingarinnar hafa farið fögrum orðum um í umræðunni.
Varðandi kaupréttinn sem um er að ræða þá er það stöðugleikinn sem skiptir mestu máli í þessu kerfi og skiptir hinar veikari byggðir mestu máli. Sjávarútvegurinn er atvinnugrein landsbyggðarinnar, númer eitt, og mestu máli skiptir að viðhalda þar stöðugleika. Vandamálið við fyrninguna er að hún kallar á óstöðugleika. Fyrningin snýst um að taka kvótann frá þeim sem eru með hann í dag og færa hann yfir til einhverra annarra. Hinar veiku byggðir á landsbyggðinni þurfa á öðru að halda en að lífsbjörgin sé rifin frá þeim.