[prenta uppsett í dálka] 5. fundur, 127. lþ.
Guðjón A. Kristjánsson (andsvar):
Herra forseti. Nú er það svo að jafnvel á síðasta fiskveiðiári nýtti aflamarksflotinn ekki veiðiheimildir sínar í steinbít. Og ég held að ég muni rétt að það hafi verið hátt í tvö þúsund tonn sem hinn stóri, öflugi aflamarksfloti nýtti ekki í steinbít heldur notaði til að búa sér til aðrar fisktegundir sem hentuðu veiðum hans betur. Þannig vil ég nú segja, hæstv. forseti, að mér finnst þessi mikli áhugi hæstv. sjútvrh. á að keyra menn inn í kvótakerfið í smábátaveiðunum ekki alveg eiga við rök að styðjast.
Ég vil líka vekja athygli á því að með hlýnandi sjó umhverfis landið hefur ýsugengd aukist á grunnslóð og þannig mun það vera meðan sjór er hlýr. Það þýðir að smábátarnir eiga betri aðgang að veiðiheimildum innan tólf sjómílna heldur en t.d. togaraflotinn, sem á almennt ekki veiðiheimildir allt í kringum landið, sérstaklega ekki fyrir vestan og norðan.
Að öllu samanlögðu er það niðurstaða mín að þetta kerfi sem er verið að setja yfir smábátana auki brottkast verulega.
