Ísólfur Gylfi Pálmason:
Herra forseti. Í dag höfum við rætt um frv. til laga um skattbreytingar. Í þeim hefur mjög margt fróðlegt komið fram. Segja má að ákvörðun ríkisstjórnarinnar um boðaðar skattalækkanir hvíli í raun á þremur stoðum.
Í fyrsta lagi er þetta gert í samræmi við góða hagstjórn, að ríkið lækki skatta þegar hægist á efnahagslífinu og aðgerðinni er í raun ætlað að virka hvetjandi á atvinnu- og efnahagslíf þjóðarinnar.
Í öðru lagi má benda á að góð afkoma ríkissjóðs á undanförnum árum gerir ríkisstjórninni mögulegt að bregðast við lækkandi hagvexti.
Í þriðja lagi er ljóst, eins og reyndar hefur komið fram í umræðum hér í dag, að síharðnandi alþjóðleg samkeppni gerir kröfur um að íslenskt skattaumhverfi sé samkeppnishæft við önnur lönd og það á auðvitað bæði við um fyrirtæki, heimili og einstaklinga.
Við erum í samkeppni við útlönd á mörgum sviðum. Við erum í samkeppni við útlönd, m.a. um vel menntað fólk. Þess eru auðvitað mörg dæmi að Íslendingar fari út í heim og læri. Margir þeirra hafa ekki snúið aftur til Íslands, m.a. vegna aðstæðna hér en aðrir hafa á seinni árum séð möguleika á Íslandi og komið til baka. Þetta skiptir allt máli. Við erum líka í samkeppni um fyrirtæki og með þessum aðgerðum minnka líkur á því að fyrirtæki flytji úr landi en þess eru einmitt dæmi í dag. Þessum staðreyndum megum við ekki gleyma þegar við fjöllum um þetta mál.
Ég er í sjálfu sér sammála mörgu því sem fram kom í ræðu hv. þm. Einars Más Sigurðarsonar, t.d. að okkur beri að tryggja velferðarkerfi í landinu. Það er alveg ljóst og um það erum við sammála. Ég er líka sammála hv. þm. um að okkur beri að efla menntun í landinu og að því hefur þessi ríkisstjórn stuðlað.
Helstu breytingar í frv. eru, eins og komið hefur fram, að tekjuskattur fyrirtækja lækkar almennt úr 30% niður í 18%. Eignarskattur fyrirtækja lækkar úr 1,5% í 0,6%. Sérstakur eignarskattur fyrirtækja, svokallaður þjóðarbókhlöðuskattur, fellur niður miðað við árslok 2002. Verðbólgureikningsskil verða afnumin frá 1. jan. 2002.
Fyrirtækjum verður heimilt að færa bókhald og árseikninga í erlendri mynt frá 1. jan. 2002 og það er í raun enn eitt dæmið um alþjóðavæðinguna sem ég kom inn á í ræðu minni. Í gær var iðnn. Alþingis m.a. í heimsókn hjá Norðuráli í Hvalfirði. Þá sáum við glöggt að þegar þeir gera reikninga sína þá miða þeir við dollara. Þetta er hluti þeirrar alþjóðavæðingar sem við höfum verið að tala um.
Í frv. er gert ráð fyrir að skattur af húsaleigubótum verði afnuminn. Þessi þáttur skilar sér til fátækasta fólksins í landinu. Það er vissulega rétt að hv. þm. Jóhanna Sigurðardóttir hefur margbent á þetta og talið þetta afar óréttlátt. Ég gleðst yfir því að þessar breytingar skuli verða að veruleika.
Það er líka talað um hækkun á frítekjumarki eignarskatts og sérstaks eignarskatts. Þessar breytingar koma sér t.d. mjög vel fyrir aldrað fólk. Í mörgum tilfellum hef ég séð dæmi um að aldrað fólk er að greiða skatta af til þess að gera lágum tekjum en þar hefur einmitt eignarskatturinn áhrif.
Tryggingagjald hækkar um 0,77% frá 1. jan. 2003. Síðan er gert ráð fyrir að stimpilgjöld lækki frá 1. jan. og það kemur sér auðvitað mjög vel bæði fyrir fyrirtæki og einstaklinga.
Mér finnst líka ástæða til í þessari umræðu að benda á aðrar skattbreytingar sem gerðar hafa verið á kjörtímabilinu. Persónuafsláttur hjóna eða sambýlisfólks var að fullu gerður millifæranlegur. Það var mikið deilumál í þinginu um mjög langan tíma. Eins og hv. þm. muna voru einungis 80% millifæranleg en nú má færa allan persónuafsláttinn á milli.
Einnig hefur verið samþykkt að gefa fólki kost á viðbótarlífeyrissparnaði, þ.e. hann hefur hækkað um 2% í 4% með mótframlagi ríkisins. Þetta hefur hvatt til sparnaðar en oft er talað um að við Íslendingar eyðum um efni fram. Skattafsláttur vegna hlutafjárkaupa hefur verið framlengdur til ársins 2002 og fjölmargir Íslendingar hafa notað sér slíkan skattafslátt. Á þessu kjörtímabili hefur einnig verið dregið úr álögum ríkisins á ökutæki, eldsneyti og verið dregið úr neyslustýringu.
Stuðningur við barnafólk hefur verið aukinn. Annar áfangi af þremur í hækkun barnabóta kemur til framkvæmda nú um næstu áramót. Alls munu barnabætur hækka um þriðjung á árinu 2002--2003, alls um 2 milljarða kr. Þar með næst fyrsti áfangi í fyrirhuguðum barnakortum. Almannatryggingabætur hafa einnig verið hækkaðar á kjörtímabilinu um 3 milljarða kr. Allt eru þetta leiðir til skattalækkana sem hafa áhrif á velferð íslensku þjóðarinnar. Við megum ekki gleyma því að hér er um aðgerðir að ræða bæði fyrir einstaklinga og fyrirtæki. Ef fyrirtækin í þessu landi ganga ekki þá verður erfitt að uppfylla þær óskir sem komu fram í ræðu hv. þm. Einars Más Sigurðarsonar, um að tryggja velferð og efla menntun. Gangi ekki að reka fyrirtæki þessa lands og reyndar heimilin þá mun okkur ganga illa að ná settum markmiðum.