[prenta uppsett í dálka] 15. fundur, 127. lþ.
Jónas Hallgrímsson (andsvar):
Herra forseti. Ég nefndi það að ferðaþjónustan þyrfti að styrkjast og eflast til að hafa tekjur til að greiða skatta. Það var megininntakið í orðum mínum.
Ég nefndi það líka að við mættum ekki vanmeta það sem Flugleiðir hafa gert. Það er vissulega mikið. Þingmenn hafa á hverju einasta þingi sem ég hef komið hér að málum verið með tillögur um hækkun á fjárlögum til Ferðamálaráðs þar sem það nyti ekki þeirra tekna sem það ætti lögformlega að hafa. Það hefur ekki náð fram að ganga.
Ég sagði áðan að við stæðum í þeim sporum í dag að það þyrfti fé úr almannasjóðum til að gera átak. Ferðamálaráð hefur ekki þá fjármuni hvernig svo sem menn líta á það. Hvort það er miðstýrt eða ekki miðstýrt skal ég ekkert um segja. Hins vegar vantar þarna sárlega peninga til landkynningar. Landkynning á að vera þannig að það á að markaðssetja landið allt, ekki aðeins þann litla hluta sem helst hefur notið þess fram að þessu.
