[prenta uppsett í dálka] 20. fundur, 127. lþ.
Jóhann Ársælsson:
Hæstv. forseti. Ég átti sæti í þessari nefnd og ég hef svo sem heyrt áður frá hæstv. ráðherra að hann telji að við höfum ekki unnið af heilindum í nefndinni. Ég verð að segja að mér finnst það ekki stórmannlegt að halda þær ræður annars staðar en í þessum þingsal.
Ég held því hins vegar fram að við höfum lagt okkur meira fram en við var að búast miðað við sjónarmið okkar og málatilbúnað á Alþingi í nefndinni. Ég vísa til þess sem hv. þm. Vilhjálmur Egilsson sagði þegar nefndarstarfinu lauk. Hann viðurkenndi að það hefði verið of langt á milli aðila og ásakaði engan um að hafa unnið af óheilindum í nefndinni. Hann hafði þó persónulega af því að segja í starfinu en hæstv. sjútvrh. byrjaði strax að elda þennan graut sem hann heldur áfram að elda alls staðar þar sem hann kemst að og getur verið í friði einn til að halda ræður sínar.
