[prenta uppsett í dálka] 20. fundur, 127. lþ.
Sjávarútvegsráðherra (Árni M. Mathiesen):
Herra forseti. Það var beinlínis rangt sem kom fram hjá hv. þm. Steingrími J. Sigfússyni að það hefði verið rétt farið með í fréttinni því það voru ekki þrír fulltrúar stjórnarandstöðunnar í endurskoðunarnefndinni eins og vitnað var til í fréttinni. Tilvitnunin um það var að þrír fulltrúar stjórnarandstöðunnar voru í auðlindanefndinni þar sem ,,sáttin`` svokallaða náðist.
Varðandi ummæli hv. þm. Jóhanns Ársælssonar vitnaði ég bara til greinargerðarinnar með frv. Samfylkingarinnar um breytingu á lögum um stjórn fiskveiða sem er flutt í þriðja skipti óbreytt á Alþingi þar sem klárlega kemur fram í greinargerðinni að vilji Samfylkingarinnar til sátta var afskaplega lítill ef nokkur, og þar segir: ,,Samfylkingin mundi aldrei samþykkja það.``
Hverjir voru að setja skilyrðin? Hverjir voru það sem ekki voru tilbúnir að ganga til sátta? Þetta eru þeirra eigin orð í þeirra eigin greinargerð með þeirra eigin frv. sem var flutt óbreytt í þriðja skipti þrátt fyrir þá vinnu sem unnin hefur verið í þessum tveimur nefndum, þrátt fyrir það að fulltrúar þeirra skrifuðu undir álit auðlindanefndarinnar. En eins og ég sagði í títtnefndri ræðu er ekki búið að leggja fram frv. um þetta efni á þinginu og menn hafa tækifæri til þess að standa saman um málið þegar Alþingi afgreiðir þá niðurstöðu sem kynnt verður hér þegar frv. verður lagt fram.
