Steingrímur J. Sigfússon:
Herra forseti. Minnst var á umræðuna í Danmörku, áður en Danir kusu um evruna og felldu aðild að henni. Það var athyglisvert, einmitt í ljósi þess að ekkert af því hefur síðan gerst í Danmörku sem hræðsluáróðurinn gekk út frá að mundi gerast ef Danir felldu. Þar hafa vextir ekki hækkað og hagkerfið tók enga dýfu þó að Danir tækju þessa ákvörðun.
Í Svíþjóð hefur þrýstingurinn farið af málinu, m.a. vegna þess að Danir felldu. Ný ríkisstjórn í Noregi hyggst ekki hreyfa þessi mál á nýhöfnu kjörtímabili og nýjustu fréttir frá Bretlandi benda til þess að ef eitthvað er þá fjarlægist Bretar á nýjan leik það að taka upp evruna. Það er helst hér uppi á Íslandi sem menn eru iðnir við kolann og reyna m.a. að nota óróleika í efnahagsmálum um þessar mundir til að þoka þessum málum eitthvað áfram og þá væntanlega í áttina að því að krónan fái ekki staðist og mögulega verðum við þá að ganga í Evrópusambandið til að geta tekið upp evru.
Þessar fyrirspurnir sem hér hafa verið á dagskrá eru auðvitað mjög athyglisvert innlegg í þessi mál, bæði spurningarnar og svörin.