[prenta uppsett í dálka] 24. fundur, 127. lþ.
Lúðvík Bergvinsson:
Virðulegi forseti. Það væri vægt orðað að segja að þessi fyrirspurn hafi vakið mikla athygli. Á öðru var þó ekki von. Hins vegar nefndi hv. þm. Kristinn H. Gunnarsson það í ræðu sinni að með því að taka upp evruna mundu menn afsala sér tilteknum möguleikum, þ.e. að beita tilteknum hagstjórnartækjum. Þetta er kannski grundvallarspurningin sem við stöndum frammi fyrir í dag. Hvað ætlar ríkisstjórnin að gera í þeirri stöðu sem upp er komin? Hvað ætlar ríkisstjórnin að gera í þeirri stöðu sem nú er komin upp, þegar dollarinn er kominn tæplega í 106 kr.? Hvað ætla menn að gera í þeirri stöðu þegar pundið er komið í 154 eða 155 kr.? Spurningin er náttúrlega: Hvaða hagstjórnartækjum ætla menn að beita? Það er þessi kjarnaspurning.
Úr því að menn eru svona áfjáðir í að halda í krónuna þá held ég að eðlilegast sé að spyrja núna: Hvað ætlar ríkisstjórnin að gera í þeirri stöðu sem upp er komin? Það verður fróðlegt að heyra svörin við því.
