[prenta uppsett í dálka] 25. fundur, 127. lþ.
Katrín Fjeldsted:
Herra forseti. Ég tek undir áhyggjur síðasta ræðumanns yfir stöðu mála hvað lýtur að verkföllum sjúkraliða. Hins vegar kynnti ég mér málið í morgun þegar hv. þm. Bryndís Hlöðversdóttir hafði samband við mig og það er rétt hjá henni að bréf frá Sjúkraliðafélaginu barst heilbr.- og trn. 14. maí sl. en skömmu síðar lauk þingi, þinglok voru þarna rétt á eftir. Síðan þegar þingið hófst í haust hefur verið rætt við ýmsa aðila sem höfðu líka samband við nefndina í vor.
Ég hafði hins vegar spurnir af því að formaður heilbr.- og trn., Jónína Bjartmarz, hefði ætlað sér að kalla sjúkraliða á næsta fund nefndarinnar. Hún gerði það ekki á fundinn í dag þar sem verið var að fara yfir fjárlagabeiðnir. Ég hef séð til þess að kallað hefur verið í stjórn Sjúkraliðafélagsins sem mun koma á nefndarfund í næstu viku.
