Fyrirspyrjandi (Drífa Snædal):
Herra forseti. Þegar ákveðið var að stofna kjarnaskóla í iðngreinum var markmiðið að þeir hefðu forgöngu um að þróa námsefni, námsskipan og kennsluaðferðir í starfsnámi og aðstoða aðra skóla og fyrirtæki við umbætur í kennslu og þjálfun á viðkomandi sviði samkvæmt lögum um framhaldsskóla 1996. Tilgangurinn var sá að efla iðn- og starfsmenntun í landinu og má segja að það hafi að nokkru leyti tekist hvað aðbúnað í kjarnaskólum varðar.
Í apríl sl. var haldin ráðstefna um menntun í dreifbýli og kom þar fram í máli Jóns Torfa Jónassonar prófessors og Helgu M. Steinsson skólameistara að fleiri nemendur af landsbyggðinni kysu iðnnám en nemendur á suðvesturhorninu. Kjarnaskólarnir eru nær allir á höfuðborgarsvæðinu og eftir að lögin tóku gildi hefur þróunin orðið sú að iðnnámskostum á landsbyggðinni hefur fækkað. Þetta hefur því orðið til þess að nemendur utan af landi þurfa í auknum mæli að flytja búferlum til að afla sér menntunar og þá sérstaklega iðnmenntunar.
Sá tækjabúnaður sem nauðsynlegur er til kennslu í verklegum greinum er kostnaðarsamur og ekki á færi smærri skóla að fjárfesta í honum. Til þess að nemendur geti búið í heimabyggð sinni og aflað sér iðnmenntunar þurfa því að koma til einhver önnur úrræði en að koma upp tækjabúnaði í öllum skólum. Það mætti t.d. haga málum þannig að nemendur tækju bóklegt nám í sínu heimahéraði í skóla eða gegnum fjarnám en sæktu svo stutt en hnitmiðuð námskeið í verklegum greinum í kjarnaskólunum. Þetta hefur verið reynt í einhverjum mæli í háriðngreinum á Austurlandi og gefist ágætlega.
Til þess að við getum gert okkur grein fyrir vandanum og brugðist við í framhaldi af því hef ég lagt fyrir hæstv. menntmrh. eftirfarandi spurningar á þskj. 312:
1. Hversu margar iðnnámsbrautir hafa verið lagðar niður á landsbyggðinni í kjölfar þess að kjarnaskólar í iðnnámi voru stofnaðir?
2. Hversu margir iðnnemar sækja nám á höfuðborgarsvæðinu en eiga lögheimili utan þess?
3. Hversu margar kennarastöður hafa verið felldar niður í kjölfar þess að iðnnámsbrautir hafa verið lagðar niður á landsbyggðinni?
4. Hvernig hyggst menntamálaráðherra fylgja eftir því markmiði að halda opnum leiðum til starfsnáms fyrir sem flesta?