[prenta uppsett í dálka] 31. fundur, 127. lþ.
Utanríkisráðherra (Halldór Ásgrímsson) (andsvar):
Herra forseti. Ég kannast við þær kenningar að miklu máli skipti að geta fjarlægt hluti. Ég las það m.a. í greinargerð Náttúruverndar ríkisins að það góða við rafmagnslínurnar væri að þær væri hægt að fjarlægja. Mér er sem ég sjái menn fara í að fjarlægja allar raflínur hingað til borgarinnar einhvern tíma í framtíðinni. Ég trúi því vart að hv. þingmenn Reykjavíkur hafi það á stefnuskrá sinni.
Auðvitað er þetta endurnýjanleg orka eins og hún er skilgreind á alþjóðavettvangi, og ég hef aldrei lent í umræðu um slík sjónarmið eins og hv. þm. Kolbrún Halldórsdóttir er að halda fram nema hér á hv. Alþingi. Þetta liggur náttúrlega alveg ljóst fyrir.
Að því er varðar ál segir hv. þm. að við eigum frekar að hvetja til þess að hætta að nota bíla. Hefur hv. þm. trú á því að við munum með ákvörðunum okkar á Íslandi fækka bílum í heiminum? (Gripið fram í.) Hefur hv. þm. virkilega trú á því að við Íslendingar getum í þessu ferli stuðlað að því að bílum muni stórfækka? Hún segir að við eigum að taka upp almenningssamgöngur. Ég er stuðningsmaður almenningssamgangna en það kemur samt ekki í veg fyrir að menn haldi áfram að nota bíla. Kannski eiga Vinstri grænir þar við að við eigum að nota hestinn í staðinn, það væri svo sem eftir öðru, eða hvað er þingmaðurinn að fara?
Þetta er náttúrlega málflutningur sem mér finnst ekki vera boðlegur í þá umræðu þegar við erum að tala um framfarir og nútíma á Íslandi.
