[prenta uppsett í dálka] 38. fundur, 127. lþ.
Sigríður Jóhannesdóttir:
Hæstv. forseti. Komið hefur fram við rannsóknir á byggðaþróun hér á Íslandi að ein af meginástæðum byggðaröskunar er of lítið námsframboð úti í hinum dreifðu byggðum.
Nemendur fara brott til að stunda nám í fjarlægum byggðum og koma ekki heim aftur, og á eftir þeim fara svo oft og tíðum fjölskyldurnar því að það er dýrt að halda úti börnum við nám í fjarlægum landshlutum. Ég verð að segja að þegar skorið er núna niður sérstakt framlag til framhaldsdeilda í þessum fjárlögum finnst mér vera höggvið þar sem hlífa skyldi. Auðvitað eigum við að standa vörð um það að hægt sé að bjóða upp á slíkt nám sem víðast og þá með aðstoð fjarnáms.
