Utanríkisráðherra (Halldór Ásgrímsson) (andsvar):
Herra forseti. Það er eðlilegt að spurt sé um hugsanlega uppfærslu EES-samningsins. Þegar ég tala um tæknilega uppfærslu hans sem Evrópusambandið hefur gefið vísbendingar um að geti gengið upp, þá á það við Maastricht-samninginn og að því er varðar Amsterdam-samninginn, þar hafa orðið ýmsar breytingar sem eru þannig að mál hafa breyst frá því að samningurinn var gerður. Þess vegna er eðlilegt að samningurinn verði endurskoðaður í ljósi þessara breytinga. Þetta á við málefni á sviði umhverfismála og félagsmála sem nauðsynlegt er að breyta.
Næsta atriði varðar aðgang okkar að ýmsum nefndum þar sem teknar eru ákvarðanir sem varða hagsmuni okkar mikið. Það er allt óvíst um hvort slíkt sé mögulegt.
Þriðja atriðið er síðan aðgangur að ýmsum stofnunum þar sem ákvarðanir eru teknar sem varða okkar hagsmuni og ekki voru til staðar þegar EES-samningurinn var gerður. Þetta á við um flugmál og þetta á við um málefni sem snerta matvæli.
Þá er ótalið atriði sem skiptir máli. Það varðar bókun 9. Það varðar þá staðreynd að það er ekki fullt tollfrelsi með sjávarafurðir okkar. Þessir ókostir EES-samningsins, sem ég vil leyfa mér að nefna svo, koma skýrar fram við stækkunina þegar þessi markaður verður stærri, þegar við þurfum að fara að sækja á þá markaði, m.a. í ljósi þess að vinnsla á síld til manneldis á þessum mörkuðum mun fara vaxandi hér á landi vegna norsk-íslenska síldarstofnsins. Þetta eru þau vandamál sem eru uppi á borðinu. Ég skal koma að þessu með Norðmenn síðar.