Þuríður Backman:
Herra forseti. Í nóvembermánuði stóð yfir atkvæðagreiðsla á vegum Landssambands kúabænda og Bændasamtakanna um hvort leyfa skyldi innflutning á fósturvísum úr norskum kúm. Þátttaka kúabænda var mjög góð og fyrir helgi var niðurstaða atkvæðagreiðslunnar birt. Hún alveg afdráttarlaus, en um 75% kúabænda höfnuðu innflutningi á norskum fósturvísum. Andstaðan er svo afgerandi að ljóst ætti að vera að öllum beiðnum um innflutning á norskum fósturvísum verði hafnað.
Herra forseti. Nú vill svo til að fyrir liggur umsókn Nautgriparæktarfélags Íslands um innflutning á norskum fósturvísum og telur formaður þess félags að niðurstaða atkvæðagreiðslunnar auki enn frekar möguleika Nautgriparæktarfélagsins til innflutnings og þurfi þá ekki að eyða tíma í samanburðarrannsóknir.
Því spyr ég hæstv. landbrh.: Mun hann virða ákvörðun meiri hluta kúabænda og hafna alfarið innflutningi á norskum fósturvísum til kynblöndunar á íslenskum mjólkurkúm?