[prenta uppsett í dálka] 42. fundur, 127. lþ.
Steingrímur J. Sigfússon (andsvar):
Herra forseti. Ég ætla svo sannarlega að vona að fjárln. hafi gert ráðuneytum og muni gera ráðuneytum það algerlega ljóst að með þessu sé ekki fallist á það fordæmi með neinum hætti að upplýsingar af þessu tagi eigi leynt að fara. Það eiga þær ekki. Þetta eru opinber málefni og það þarf að reka ofan í kokið á forsrn., alla leið.
Þó mætti segja að í kúvendingu forsrn. frá því í gær sé fólgin viðurkenning á því að afstaðan sem embættismaður ráðuneytisins tók á tölvumiðanum fræga í gær var fráleit og aumkunarverðastur verður náttúrlega hlutur forseta þingsins, Halldórs Blöndals, sem hljóp til varnar þeirri vitleysu í gær sem forsrn. hefur núna dregið til baka.
Mergurinn málsins er sá að Alþingi má undir engum kringumstæðum fallast á að verið sé að gefa fordæmi um að upplýsingar af þessu tagi eigi að fara leynt. Þetta er ráðstöfun opinberra fjármuna og það á að vera opinbert mál.
