Guðmundur Árni Stefánsson (um atkvæðagreiðslu):
Herra forseti. Maður er eilítið hugsi við upphaf þessarar atkvæðagreiðslu, hvort frv. og þær tillögur sem hér liggja fyrir séu yfirleitt á vetur setjandi og hvort yfirleitt sé nokkurt vit í því að afgreiða þessar tillögur eins og venja er til samanborið heimildir til ráðherra, sumar ansi víðtækar þegar fyrir liggur í stórauknum mæli að ráðherrar ríkisstjórnarinnar reynast mjög tregir í taumi þegar kemur að einföldum spurningum í þá veru hvernig þeir hafi notað þær heimildir sem Alþingi er að veita þeim. Það liggur í augum uppi að menn hafa í ljósi þessarar nýfengnu reynslu og þess tappa sem virðist í upplýsingastreymi frá framkvæmdarvaldi til þingsins ástæða til að endurmeta verklag og vinnubrögð þegar kemur að opnum heimildum þingsins til handa framkvæmdarvaldinu. Ég held að menn hljóti að skoða það í framhaldi þessa.