[prenta uppsett í dálka] 45. fundur, 127. lþ.
Frsm. meiri hluta efh.- og viðskn. (Vilhjálmur Egilsson) (andsvar):
Virðulegi forseti. Að sjálfsögðu hafa þessi mál öllsömul verið rædd í þaula á stjórnarheimilinu. Hlutverk þessara skattbreytinga er að búa í haginn fyrir nýtt hagvaxtarskeið á Íslandi. Á árunum 1995--2000 var eitt glæstasta hagvaxtarskeið Íslandssögunnar, einmitt m.a. vegna þeirra breytinga sem gerðar hafa verið á innviðum íslenska hagkerfsins, þar með talin skattlagning atvinnulífsins.
Þjóðhagsstofnun kom til efh.- og viðskn. í gær, og vissulega erum við að fara í gegnum ákveðna aðlögun á næsta ári. En þegar á árinu 2003 spáir Þjóðhagsstofnun 3% hagvexti að því tilskildu að vísu að það takist að koma álversframkvæmdum og -virkjunum í gang og ég ætla bara rétt að vona að hv. þm. standi hvorki í vegi fyrir þeim skattbreytingum sem hér er verið að leggja til, sem eru nauðsynlegar til þess að ná hagkerfinu aftur í gang, né gegn álversframkvæmdunum.
