[prenta uppsett í dálka] 45. fundur, 127. lþ.
Pétur H. Blöndal (andsvar):
Herra forseti. Ég þakka hv. þm. Jóhönnu Sigurðardóttur fyrir afskaplega yfirgripsmikla og góða ræðu þó að ég sé í flestum atriðum ekki sammála henni.
Það er eitt sem mig langar til að spyrja hv. þm. sem situr í hv. efh.- og viðskn. --- hún hefur væntanlega kynnt sér umsögn mína um þetta frv. í nefndinni --- og spurning mín er hvort hún fallist á útreikninga mína, að hagnaður ríkissjóðs af sölu ríkisfyrirtækja verði 12 milljarðar vegna lækkunarinnar úr 30% í 18%. Og hvort hún fallist enn fremur á það að ríkissjóður mundi hagnast til viðbótar um 7 milljarða ef farið yrði niður í 11% og hvort hv. þm. með hliðsjón af velvild hennar gagnvart velferðarkerfinu væri ekki tilbúin til að styðja lækkun niður í 11% til að geta nýtt þessa 7 milljarða til að bæta stöðu fatlaðra og annarra í velferðarkerfinu.
Síðan segir hv. þm. að skattasniðganga muni aukast mikið, og las það upp. Spurning mín til hv. þm. er: Hefur hv. þm. einhverjar tölur í því sambandi? Hve margir munu ,,sníða fram hjá skattinum`` eins hún kallar það eða svíkja undan skatti eins og það heitir á íslensku? Og telur hún að þessi skattsvik mundu aukast enn frekar ef farið yrði í 11% skatta á hagnað fyrirtækja?
