[prenta uppsett í dálka] 45. fundur, 127. lþ.
Frsm. 1. minni hluta efh.- og viðskn. (Jóhanna Sigurðardóttir) (andsvar):
Herra forseti. Ég vil líka þakka hv. þm. fyrir ágætt samstarf í nefndinni.
Varðandi tryggingagjaldið og hækkun á því þá hef ég rökstutt það með vísan t.d. í umsögn ASÍ, með vísan í verðlagsáhrifin af tryggingagjaldinu, sem er 0,3--0,4%, að þessi skattlagning íþyngir fyrirtækjunum verulega. Ég nefndi hér að þegar verið er að setja auknar álögur á félög með mikla launaveltu geti það hugsanlega leitt til uppsagna og haft þau áhrif. Ég vitna líka til þess að ASÍ segir hreinlega í umsögn sinni að þetta sé mjög vont innlegg inn í kjarasamninga, m.a. vegna þeirra áhrifa sem þetta hefur á verðlag og einnig á minni getu fyrirtækjanna til þess að greiða laun.
Varðandi mismunandi skattlagningu á eignarskatti lögaðila þá teljum við að skynsamlegra sé að fara þá leið núna að lækka skattana á lögaðilana minna en tillögur ríkisstjórnarinnar gera ráð fyrir. Við teljum skynsamlegra að verja þá þeim hluta í að lækka stimpilgjöldin um þriðjung sem gagnast fyrirtækjunum mjög vel. Líka má segja um lágan fjármagnstekjuskatt, eins og við erum að tala um, að raunverulega megi líta á eignarskattana sem staðgengil fjármagnstekjuskatts og lagfæringu á ranglátu tekjuskattskerfi. Þeir tekjuhæstu og eignamestu sleppa best og eignarskattur einkum á fyrirtæki er bara smávegis leiðrétting. Ég held því að öll rök mæli með því að fara þessa leið.
