[prenta uppsett í dálka] 45. fundur, 127. lþ.
Kristján L. Möller (andsvar):
Herra forseti. Já, ég vildi óska að ég gæti lært af öðrum þingmönnum það sem ég hef lært af hv. þm. Jóhönnu Sigurðardóttur á tveggja ára ferli. Ég vildi óska að ég gæti lært jafnmikið af öðrum þingmönnum.
Ég eyddi töluverðum tíma í að ræða um tryggingagjaldið, hv. þm. Guðjón Guðmundsson. Ég spurði hvort það væri ekki íþyngjandi. Í skýrslum kemur fram að á Vesturlandi munu eignarskattar af fyrirtækjum lækka um 59 millj., tekjuskattur um 62 millj. en tryggingagjald mun hækka um 118 millj. Þannig að fyrirtæki á Vesturlandi munu einungis græða um 4 millj. meðan fyrirtæki í höfuðborginni græða um 2,7 milljarða.
Er þetta, hv. þm., til þess að létta atvinnurekstur á landsbyggðinni?
Og svo rétt í lokin: Er ekki töluvert verið að ráðast hér að sveitarfélögunum sem við berum umhyggju fyrir? Er ekki verið að skerða ráðstöfunartekjur sveitarfélaga um 1.500--1.800 millj. með þeim breytingum sem verið er að boða?
Það er þetta sem ég er að ræða um sem eru auðvitað árásir á landsbyggðarekstur, á sveitarfélög á landsbyggðinni, sem þola ekki mikið fyrir, þetta er það versta í þessum skattalagapakka.
