Einar Oddur Kristjánsson (andsvar):
Herra forseti. Ég hef áður farið yfir það í ræðu minni og bent mönnum á það hvernig kostnaðarskipting er á Íslandi miðað við öll önnur Evrópuríki. Sjúklingar borga hér hlutfallslega helmingi minna en í öðrum Evrópuríkjum.
Ég hef líka farið yfir það áður að hlutdeild hins opinbera á Íslandi í heilbrigðismálum er mjög mikil. Gríðarlega miklum peningum er veitt til þessa málaflokks. En ég get tekið undir það með öllum öðrum hv. þm. hér og nú og fyrir 5 árum, 10 árum og 15 árum að það er ástæða til að fara yfir það hvernig við verjum þessum peningum, hver stjórn okkar á heilbrigðismálunum er, hvernig þeim er varið. Allar þjóðir Evrópu eiga við þennan vanda að stríða.
Tilhneigingin til þess að peningarnir fara allir í hátækni og viðgerðarþjónustu er alls staðar rík í staðinn fyrir að koma peningunum niður í heilbrigðiseftirlitið.