[prenta uppsett í dálka] 46. fundur, 127. lþ.
Einar Már Sigurðarson (andsvar):
Herra forseti. Hv. þm. Kristján Pálsson kom víða við í ræðu sinni. Ég ætla nú ekki að fara yfir sviðið allt en velta upp a.m.k. tveimur þáttum í ræðunni.
Sá kafli ræðunnar sem fjallaði um byggðamálin var athyglisverður. Mér finnst nauðsynlegt að spyrja hv. þm. hvort hann hafi einhverjar upplýsingar sem hv. þm. Ísólfur Gylfi Pálmason hafði ekki --- en þeir félagar sitja báðir í meiri hluta fjárln. --- varðandi það að væntanlega kæmu inn tillögur vegna nýrrar byggðaáætlunar. Því miður hefur slíkt ekki sést á borðum okkar í fjárln. og spurning hvort þetta hefur á einhvern hátt verið skýrt í meiri hluta fjárln. Hvað veldur því að eingöngu eru teknir út þeir liðir sem tilheyrðu gömlu byggðaáætluninni en hin nýja byggðaáætlun á sér hvergi stoð í fjárlagafrv.?
Hitt málið sem ég kem að í seinna andsvari mínu og hv. þm. getur farið að undirbúa sig með varðar framhaldsskólana.
