Rannveig Guðmundsdóttir:
Herra forseti. Samfylkingin styður að sjálfsögðu afnám skatta á húsaleigubætur. Það var mikil réttarbót fyrir fólk á leigumarkaði þegar lög um húsaleigubætur voru sett að frumkvæði jafnaðarmanna. Okkur fannst eðlilegt að húsaleigubætur væru ekki skattlagðar fremur en vaxtabætur en um það náðist ekki samstaða á sínum tíma. Hins vegar voru bæturnar hækkaðar krónulega sem nam skattlagningunni þá sem gaf ákveðna viðurkenningu á stöðunni.
Nú í árslok 2001, sjö árum síðar, hefur barátta jafnaðarmanna undir forustu Jóhönnu Sigurðardóttur skilað árangri. Afnám skatta á húsaleigubætur skiptir miklu máli fyrir kjör fólks á leigumarkaði og þessi langþráða lagabreyting, herra forseti, er áþreifanleg sönnun þess að dropinn holar steininn líka hér á Alþingi.