Vilhjálmur Egilsson:
Virðulegi forseti. Með þeirri breytingu sem hér er verið að gera á skattalögum er stigið mjög mikilvægt skref í þá átt að gera íslenskt atvinnulíf alþjóðlega samkeppnishæft. Ef við lítum á það hvernig staðan hefur verið og skoðum tekjuskattsprósentuna, eignarskattshlutfallið og fjármagnstekjuskattinn, þá þarf ekki að koma svo mikið út úr rekstri fyrirtækja í hagnað til þess að skattur á þann hagnað sé yfir 50%. Með þessari breytingu er verið að lækka tekjuskattsprósentuna niður í 18%. Síðan er eignarskatturinn líka að lækka og sameiginleg áhrif af þessu verða til þess að skattlagning á arð úr íslenskum atvinnurekstri gerir hann mjög samkeppnishæfan í öllum alþjóðlegum samanburði.