Ögmundur Jónasson:
Herra forseti. Nú stefnir því miður í að við sitjum uppi með skattkerfisbreytingar sem eru í senn ósanngjarnar og óskynsamlegar. Mikil andstaða hefur komið fram gegn þessum breytingum í þjóðfélaginu og andstaðan fer vaxandi eftir því sem það rennur upp fyrir fólki hvað hér er að gerast.
Tillögurnar eru gagnrýndar einnig vegna þess að þær þykja á margan hátt varasamar í tæknilegu tilliti og á fulltrúum Þjóðhagsstofnunar og Seðlabanka er að skilja að það sé mjög varasamt að ráðast í þessar breytingar við það óvissuástand sem við búum við nú.
Við teljum að með tilliti til þessa, ósættisins og óvissunnar, sé hyggilegt að skjóta þessum skattkerfisbreyting á frest og freista þess að ná samstöðu innan þings og utan um breytingar á skattkerfinu sem eru í senn sanngjarnar og skynsamlegar og samstaða getur orðið um.