[prenta uppsett í dálka] 48. fundur, 127. lþ.
Kristján L. Möller (andsvar):
Herra forseti. Ég þakka hv. þm. fyrir að gefa mér tækifæri til að ræða aðeins betur um fjarvinnsluverkefnin. Ég er ekkert að gera lítið úr þeim. Ég tók skýrt fram að ég held að hægt sé að nefna einn stað á Íslandi þar sem fjarvinnsluverkefni hafa gengið vel fyrir sig og það er á vegum Kaupþings á þeim ágæta stað Siglufirði. Ráðuneytin hafa algjörlega klikkað í fjarvinnsluverkefnum sínum og nægir þar að nefna og vitna til svars sem ég skal aðeins höggva hér ofan í. Það er fyrirspurn mín til hæstv. iðn.- og viðskrh. um fjarvinnsluverkefni og hversu mörg störf á vegum ráðuneyta, stofnana og fyrirtækja í eigu ríkisins voru flutt út á land árið 2000.
Dóms- og kirkjumrn. svarar því til að ráðuneytið hafi ekki flutt nein verkefni. Forsrn. svarar því til: engin verkefni. Fjmrn. greinir frá því: engin fjarvinnsluverkefni. Landbrn. upplýsir að engin fjarvinnsluverkefni eða störf tengd þeim hafi verið flutt út á land á sl. ári. Menntmrn. tiltekur engin störf sem hafi verið flutt frá ráðuneytinu í fjarvinnsluverkefni o.s.frv.
Herra forseti. Það er rétt sem hér kom fram að það er örlítið á vegum ríkisins eða ríkisstofnana. Það hefur að mér skilst verið hálft starf á Hvammstanga og það var nú þannig að milli umræðna í fjárlögunum tókst loksins að hífa það upp í 15 milljónir, það var nú reyndar komið niður í 6 milljónir og leit út fyrir að allt mundi detta út.
Herra forseti. Í stuttu máli sagt hafa ráðuneytin staðið sig ákaflega illa og eru með allt niður um sig í flutningi fjarvinnsluverkefna út á land. Vitna ég í þá skýrslu sem Iðntæknistofnun lagði fram og hæstv. forsrh. gerði mikið úr þegar verið var að tala um að flytja fjarvinnsluverkefni út á land, að nú væri komin ný atvinnugrein fyrir landsbyggðina.
Herra forseti. Ég ætla aðeins að vitna í orð hæstv. forsrh. á Alþingi 23. febr. árið 2000 um flutning tiltekinna verkefna til Ólafsfjarðar, með leyfi forseta:
,,Ég tel að þessi vinna sem einkum hinir fjórir ráðuneytisstjórar hafa komið að sé í góðum farvegi. Þó að ég vilji ekki tímasetja á þessu augnabliki nákvæmlega hvenær starfsemin geti hafist, þá er vinnan komin vel af stað og ákvörðun af því tagi hefur því verið tekin.`` --- Þ.e. að flytja fjarvinnsluverkefni til Ólafsfjarðar.
Herra forseti. Það hefur ekkert verið flutt þangað af fjarvinnsluverkefnum.
