Ásta R. Jóhannesdóttir:
Herra forseti. Fram kom hjá hv. þm. Margréti Frímannsdóttur að fjárveitingar hafa lækkað til þessa málaflokks og það tel ég mjög alvarlegt. Auðvitað þyrfti að efla forvarnir í þessum efnum. Myndbönd, upplýsingabæklingar, heimasíður, allt gerir gagn.
Aftur á móti langar mig að nefna eitt atriði sem varðar heilsugæsluna og spyrja hæstv. ráðherra: Nú hefur verið á vegum heilsugæslunnar t.d. í Hafnarfirði unglingaþjónusta í þessu markmiði sem er ekki sérstaklega styrkt af heilbrrn: Hvers vegna koma ekki fjárveitingar til slíkrar starfsemi? Þyrfti ekki að efla þær? Hæstv. ráðherra nefnir 2.000 tilfelli af klamýdíu sem hefur í för með sér alvarlegan frjósemisvanda sem mun verða heilbrigðiskerfinu mjög dýr síðar meir. Því spyr ég hæstv. ráðherra: Er ekki tímabært að leggja peninga í unglingaþjónustu eins og þá sem nú er í Hafnarfirði?