Guðjón Guðmundsson (andsvar):
Herra forseti. Hv. þm. sagði eitthvað á þá leið í sinni löngu og ítarlegu ræðu að flokkur hv. þm. Péturs H. Blöndals, sem jafnframt er flokkurinn minn, vildi einkavæða sem mest í opinberri þjónustu. Hann nefndi í því sambandi skóla, heilbrigðisstofnanir, vatnsveitur og eitthvað fleira, og sagði jafnframt að það væru fjárglæframenn sem gerðu sér þetta að féþúfu.
Nú vil ég spyrja hv. þingmann: Hvaða fjárglæframenn eru það sem gera sér að féþúfu rekstur skóla, heilbrigðisstofnana, vatnsveitna og annarrar þjónustu sem hann nefndi hér áðan? Ég óska skýringa á því.