Iðnaðarráðherra (Valgerður Sverrisdóttir) (andsvar):
Hæstv. forseti. Það er nú ekki þannig, hv. þm., að erfiðleika þá sem hafa komið upp í Noregi megi rekja til þess fyrirkomulags sem þar er í sambandi við raforkumál. Þess má geta að Norðmenn voru fyrsta þjóðin til þess að taka upp frjálsræði í raforkumálum og gerðu það löngu áður en þeir voru tilknúnir til þess vegna aðildar sinnar að Evrópska efnahagssvæðinu.
Það hefur verið sérstaklega kalt í Noregi í vetur og upp hafa komið alls konar vandamál þar í tengslum við það. Þannig að það sem hv. þm. gat hér um er ekki hægt að rekja til þess fyrirkomulags sem að viðhaft er í sambandi við rekstur raforkukerfisins.