Guðmundur Árni Stefánsson:
Herra forseti. Það vekur alveg sérstaka athygli að hæstv. forseti skuli standa hér einn til varnar við þessar aðstæður. Ég hef hins vegar allan skilning á því. Stjórnarliðar reyna auðvitað ekki eðli máls samkvæmt að verja þennan gjörning, enda er engin vörn til í málinu.
Herra forseti. Mér heyrist að einhver misskilningur sé hér á ferð ef hæstv. forseti skilur ekki það sem á blaði stendur og í hverju beiðni þingmanna Samfylkingarinnar er fólgin. Það segir orðrétt að við viljum, með leyfi forseta:
,,... fara þess á leit við forsætisnefnd Alþingis að hún feli Ríkisendurskoðun að gefa Alþingi skýrslu um fjárhagsleg uppgjör Landssíma Íslands hf. við fyrrv. forstjóra fyrirtækisins, Þórarin Viðar Þórarinsson, sem gert var í tengslum við starfslok hans hjá fyrirtækinu, auk tengdra atriða.``
Getur þetta skýrara verið? Það er verið að ræða um starfslokasamninginn, og tré og runnar mega fylgja.
Herra forseti. Þetta er dapur dagur í sögu þingsins og því miður verður að segja það eins og það er að hæstv. forseti Alþingis hefur ekki stækkað af þessu máli, þvert á móti.