[prenta uppsett í dálka] 74. fundur, 128. lþ.
Össur Skarphéðinsson (andsvar):
Herra forseti. Það er greinilegt að hv. þm. Halldór Blöndal óttast það þegar ég fer ásamt forsætisráðherraefni Samfylkingarinnar í ferðalag um landsbyggðina. Hvers vegna óttast hann það? Vegna þess að eitt af því sem við munum að sjálfsögðu gera að umræðuefni og gera að kosningamáli á landsbyggðinni er þróun vöruverðs þar. Hvert munum við rekja hækkun vöruverðs á landsbyggðinni undanfarin fjögur ár? M.a. til þeirra skattahækkana sem hv. þm. Halldór Blöndal hefur stutt í gegnum aðild sína að þeirri ríkisstjórn sem nú situr. (Gripið fram í: Hvað kemur ...?)
Herra forseti. Hv. þm. hefur spurt mig um það með hvaða hætti ég vilji breyta landinu í svæði og hafa mismunandi þungaskatt út frá þeim. Ég tek það svo, herra forseti, að hv. þm. Halldór Blöndal sé ráðþrota og sé í reynd að lýsa yfir stuðningi við þessa hugmynd og sé að biðja Samfylkinguna að koma með ráð í þessum efnum. Það er sjálfsagt að verða við því, herra forseti. Ég hef sagt það skýrt og skorinort að fyrirmynd mín í þessum efnum er Noregur.
