[prenta uppsett í dálka] 75. fundur, 128. lþ.
Ögmundur Jónasson (andsvar):
Herra forseti. Ég held að við eigum að sýna virðingu okkar fyrir íslenskum sjómönnum í verki með því að fara að ábendingum samtaka þeirra. Eins og ég gat um áðan og komið hefur fram í máli annarra þingmanna hafa nánast öll samtök íslenskra sjómanna, Farmanna- og fiskimannasambandið, Sjómannasambandið, Samband smábátaeigenda, Vélstjórafélag Íslands svo og Alþýðusamband Íslands ályktað gegn þessu frv. Ef við viljum sýna virðingu okkar fyrir íslenskum sjómönnum í verki þá eigum við að virða ábendingar þeirra.
Ég geri mér grein fyrir því að það hefur tíðkast á heimshöfunum að hafa þennan hátt á og ég gat um þá neikvæðu samkeppni sem leitt hefur til þess að kjör sjómanna á skipum, þar á meðal íslenskum skipum, hafa rýrnað. Íslenskir kjarasamningar hafa ekki verið virtir í þeim tilvikum og samtök sjómanna hafa reynt að sporna gegn þessari þróun. Við eigum að leggjast á árarnar með sjómönnum í þessu efni. Ef við viljum sýna þeim virðingu þá á að gera það í verki.
