[prenta uppsett í dálka] 79. fundur, 128. lþ.
Guðmundur Árni Stefánsson:
Herra forseti. Í tilefni af orðum hv. þm. Hjálmars Árnasonar vil ég segja að það er vissulega hárrétt ábending að þau mál sem hér á að ræða utan dagskrár á eftir hafa verið á dagskrá þingsins. Ég vil á hinn bóginn vekja á því athygli að á allra síðustu sólarhringum hafa orðið þeir atburðir í tengslum við þetta mál sem kalla eftir því að þessi mál séu rædd undir þeim nýju formerkjum.
Ég vísa hér einkanlega til þriggja atriða. Í fyrsta lagi minni ég á útspil ríkisstjórnarinnar í samgöngumálum frá í gær. Í öðru lagi er ég að vísa til yfirlýsingar forsrh. um skattamál almennt frá í gær. Í þriðja lagi vísa ég til ákvörðunar samgrh. frá í fyrradag er lýtur að markaðssókn í ferðamannaiðnaði upp á um hálfan milljarð kr. samtals. Öll þessi atriði kalla á nýja nálgun að þessu viðfangsefni.
Ég held að full ástæða sé til að fara í þessa umræðu.
