Ögmundur Jónasson:
Herra forseti. Það er alveg með ólíkindum, þetta ábyrgðarleysi sem kemur fram í svari hæstv. ráðherra, stormur í vatnsglasi. Eftirlitsstofnunin, ESA, hefur kallað eftir viðbótarupplýsingum, viðbótargögnum. Svo kynni að fara að samningurinn standist ekki ákvæði EES-samningsins. Hvað gerist þá? Þá fá Íslendingar á sig kæru. Það mun leiða til þess að taka verður upp samninginn, ákvæði samninganna. Nú stendur til að undirrita samninga í næsta mánuði ef áform ríkisstjórnarinnar ná fram að ganga og ég spyr: Hver kemur til með að verða skaðabótaskyldur ef þörf reynist á því að taka samninginn upp samkvæmt kröfu ESA?
Herra forseti. Að afgreiða þetta mál sem storm í vatnsglasi er fullkomið ábyrgðarleysi.