Fyrirspyrjandi (Jón Bjarnason):
Herra forseti. Ég beini fyrirspurn minni um stofnun framhaldsskóla á Snæfellsnesi til hæstv. menntmrh. Eins og þingheimi er kunnugt hafa sveitarstjórnir Snæfellsbæjar, Grundarfjarðar, Helgafellssveitar og Stykkishólms á undanförnum árum unnið að hugmyndum um stofnun framhaldsskóla á Snæfellsnesi í samvinnu við menntmrn. Einhugur hefur verið meðal sveitarfélaganna um málið.
Við afgreiðslu fjárlaga á Alþingi í haust fluttum við þingmenn Vinstri hreyfingarinnar -- græns framboðs tillögur um að stofnun skólans yrði ákveðin í fjárlögum og veitt til þess skilgreind fjárveiting. Við þá umræðu gaf hæstv. menntmrh. svohljóðandi yfirlýsingu, með leyfi forseta:
,,Herra forseti. Ég hef ákveðið að leggja til fjármuni af ráðstöfunarfé menntmrn. til undirbúnings framhaldsskóla á Snæfellsnesi og ég hygg að heimamenn séu sáttir við þá lausn mála.``
Herra forseti. Sú fyrirspurn sem ég ber fram kom fram fyrir um þrem vikum en hún hljóðaði svo:
1. Hversu miklu fé hyggst ráðherra verja á þessu ári til stofnunar framhaldsskóla á Snæfellsnesi í samræmi við yfirlýsingu sem ráðherrann gaf á Alþingi við 2. umræðu fjárlaga í nóvember sl.?
2. Mun ráðherra tryggja að framhaldsskóli Snæfellinga á Snæfellsnesi taki til starfa haustið 2003 eins og að hefur verið stefnt?
Í byrjun febrúar var gefin út fréttatilkynning sem greindi frá því að samkomulag hefði tekist á milli menntmrh. og fulltrúa sveitarfélaganna á Snæfellsnesi um að hafinn verði undirbúningur að stofnun framhaldsskóla á norðanverðu nesinu. Eða eins og stendur í tilkynningunni, með leyfi forseta:
,,Gert er ráð fyrir að skólinn verði staðsettur í Grundarfirði. Lögð verður áhersla á að þessi nýi framhaldsskóli verði leiðandi í notkun upplýsingatækni og nýti sér m.a. kosti dreifnáms. Sérstaða hans verði að námið fari fram bæði staðbundið og í fjarnámi.``
Og áfram stendur í þessari fréttatilkynningu, með leyfi forseta:
,,... samkomulagið fela í sér að starfsmaður verði ráðinn á þessu ári til undirbúnings og stefnumótunar fyrir skólann.``
,,... ráðuneytið muni beita sér fyrir því að það fáist framlög til skólans á fjárlögum næsta árs.``
Virðulegi forseti. Ég fagna þessari yfirlýsingu en leyfi mér þó áfram að spyrja og ítreka:
Hvenær verður þá gengið til formlegs undirritaðs samkomulags um stofnun skólans og ferill þess alls tímasettur þannig að tryggt verði að vinnan skili þeim árangri sem að er stefnt?
Í öðru lagi til viðbótar þeim spurningum sem hérna liggja fyrir: Hyggst ráðherrann nú þegar í ár, á næsta hausti, efla framhaldsdeildirnar í Stykkishólmi og í Ólafsvík til þess að undirbúa enn betur stofnun skólans?