Fyrirspyrjandi (Guðjón Guðmundsson):
Herra forseti. 10. mars 1999 samþykkti Alþingi þál. um hvalveiðar. Samþykktin var gerð í framhaldi af tillögu sem ég flutti ásamt 11 öðrum hv. þm. um að hvalveiðar skyldu leyfðar á ný sumarið 1999. Eftir ítarlega umfjöllun í sjútvn. var tillgr. breytt lítillega og hljóðaði samþykkt Alþingis svo, með leyfi forseta:
,,Alþingi ályktar að hefja skuli hið fyrsta hvalveiðar hér við land og tekur fram að ályktun þess frá 2. febrúar 1983 stendur ekki í vegi fyrir því. Veiðarnar fari fram á grundvelli vísindalegrar ráðgjafar Hafrannsóknastofnunarinnar og undir eftirliti stjórnvalda.
Alþingi leggur áherslu á óskoraðan fullveldisrétt Íslands við nýtingu hvalastofna á íslensku hafsvæði í samræmi við alþjóðlegar skuldbindingar um sjálfbæra nýtingu lifandi auðlinda.
Alþingi felur ríkisstjórninni að undirbúa hvalveiðar, meðal annars með því að kynna málstað og sjónarmið Íslendinga meðal viðskiptaþjóða okkar. Undirbúningur miði að því að veiðar geti hafist sem fyrst. Kostnaður við kynninguna verði greiddur úr ríkissjóði. Öllu kynningarstarfi verði flýtt svo sem auðið er.``
Þessi tillaga var samþykkt með 37 atkvæðum gegn 8. Í greinargerð meiri hluta sjútvn. kom fram að miðað væri við að veiðarnar gætu hafist eigi síðar en á næsta ári, þ.e. árið 2000, og jafnframt að með þessari ályktun sé ályktun Alþingis frá 2. febrúar 1983 um að mótmæla ekki hvalveiðibanninu upphafin og mörkuð ný stefna þar sem það kemur skýrt og skorinort fram að hvalveiðar skuli hefjast að nýju og það hið fyrsta. Þetta er mjög afdráttarlaust.
Óþarfi er að tína til öll þau rök sem ég flutti fyrir þessari tillögu á sínum tíma og öll eiga við enn þann dag í dag. Ég minni þó á að Hafrannsóknastofnunin taldi fæðunám hvala á Íslandsmiðum um 6,2 millj. tonna á ári, þar af rúmlega 2 millj. tonna af fiski, og enn fremur að ef hvalveiðar yrðu ekki leyfðar að nýju og hvölum yrði leyft að fjölga sér óhindrað á hafsvæðinu við Ísland gæti farið svo að innan fárra ára þyrfti að draga úr þorskveiðum um 10--20% miðað við það sem ella hefði orðið.
Enn fremur má minna á ítrekaðar og eindregnar óskir um að hvalveiðar verði hafnar frá öllum heildarsamtökum sjómanna, útvegsmanna, verkafólks og sveitarfélagana í landinu auk fjölda annarra. Þá hafa ítrekaðar skoðanakannanir sýnt yfirburðastuðning landsmanna við hvalveiðar. Það er því vandfundið mál sem meiri samstaða er um meðal landsmanna. Ég beini því svohljóðandi fyrirspurn til hæstv. sjútvrh.:
Hvað líður framkvæmd þingsályktunar um hvalveiðar sem samþykkt var á Alþingi 10. mars 1999?