Lára Margrét Ragnarsdóttir (andsvar):
Hæstv. forseti. Ég þakka hv. þm. Össuri Skarphéðinssyni sérlega fyrir þessa spurningu því svo illa vildi til að þegar 3. umr. um gagnagrunna fór fram á sínum tíma, um þá víðfrægu gagnagrunna, var ég ekki viðstödd umræðuna vegna veikinda og gat hvorki tekið þátt í þeirri umræðu, né heldur atkvæðagreiðslu. Ég hafði hins vegar ýmsar efasemdir uppi í 1. og 2. umr. um þá gagnagrunna, m.a. um það hvort ekki væri tæknilega unnt að fara inn í dulkóðun ef mönnum hentaði svo og nægilega vel væri unnið að því. Ég verð að segja að okkur hv. þm. greinir á aðeins í einu, og það er að ég er enn ekki sannfærð um það að gagnagrunnar séu svo tryggir að ekki sé hægt að fara inn í þá.